Ömurleg óþægindi vegna klúðurs með afsal

„Við vorum að skuldbreyta hjá okkur og þegar ég fór með samninginn frá bankanum í þinglýsingu kom í ljós að afsalinu á húsinu okkar hafði aldrei verið þinglýst því fasteignasalinn sendi það aldrei til sýslumanns,“ segir Þórunn Sigurðardóttir læknaritari, sem var búin að búa í fjögur ár í fasteign sinni þegar það kom í ljós að í raun voru hún og maður hennar ekki fullgildir eigendur eignarinnar.

Hjónin hafa þó greitt fasteignagjöld og fengið vaxtabætur allan tímann. Kaupsamningi var þinglýst og þau höfðu skrifað undir afsal á eigninni en fasteignasalinn gleymdi að fara með afsalið í þinglýsingu.

„Þegar við komumst að þessu fórum við til fasteignasalans til að fá afsalið og láta þinglýsa því en þá fann hann engin gögn. Við vorum í tímaþröng með skuldbreytinguna og til að fá hana í gegn hjá bankanum þurftum við að fara til fyrri eiganda hússins okkar og biðja hann um að skrifa undir lánsumsóknina. Það var ömurlegt að þurfa að blanda honum í okkar fjármál og í raun hefði hann vel getað neitað,“ segir Þórunn og bendir á að hefði hún ekki farið í breytingu á íbúðarláninu viti hún ekki hvenær hún hefði komist að því að þau hjónin væru ekki með þinglýsta eignarheimild á fasteigninni.

Hjónin borguðu á annað hundrað þúsund til fasteignasölunnar í svokallað umsýslugjald. Í gjaldinu felst að fasteignasalinn ber til að mynda ábyrgð á að þinglýsa samningum og ganga frá sölunni.

Óþægindi en ekki tjón

Til að fasteignasalar geti rækt lagalega skyldu sína samkvæmt lögum nr. 99/2004 um sölu fasteigna, fyrirtækja og skipa er nauðsynlegt að fasteignasali sjái sjálfur um að koma skjölum til þinglýsingar enda getur það varðað hann skaðabótaskyldu ef kaupandi eða seljandi hyggjast ganga frá þeim málum og gögnin skila sér ekki.

Grétar Jónasson, framkvæmdastjóri Félags fasteignasala, segir takmarkanir vera á eignarrétti þegar afsali hefur ekki verið þinglýst.

„Aðalmálið er að kaupandi hefur ekki fullan yfirráðarétt, getur ekki fengið veð eða selt eignina. En það er ekki skaðabótaskylda á fasteignasalann þar sem fólk verður ekki fyrir tjóni en vissulega verður það fyrir óþægindum og leiðindum,“ segir Grétar Jónasson.