Metfjöldi í húsgagnasmíði á Akureyri

Aldrei hafa fleiri nemendur stundað nám í húsgagnasmíði við Verkmenntaskólann á Akureyri (VMA). Í haust hófu tólf annars árs nemar við byggingadeild skólans nám í húsgagnasmíði og segir Halldór Torfi Torfason, brautarstjóri byggingagreina hjá VMA, að þeir hafi aldrei verið fleiri í tæplega þrjátíu ára sögu skólans.

„Við urðum strax vör við aukinn áhuga á húsgagnasmíði og húsgagnaviðgerðum eftir hrun. Hugsunarhátturinn breyttist hjá mörgu fólki og það fór að horfa til baka. Húsgagnasmíði var reyndar nokkuð öflug iðngrein hér á Akureyri áður fyrr en með auknum innflutningi á húsgögnum lognaðist hún nánast út af.“

Að sögn Halldórs er markmið nemenda ólíkt með náminu. „Sumir nemenda eru komnir hingað til að læra að smíða innréttingar og húsgögn, aðrir vilja gera upp gömul húsgögn og svo eru einhverjir í hópnum á leið í áframhaldandi nám og jafnvel í hönnunarnám. Helmingur nemenda í húsgagnasmíði er á aldursbilinu 30-50 ára og kynjahlutfallið er næstum því jafnt.“

Nám í húsgagnasmíði tekur fjögur ár, þar af fimm annir á skólabekk og 18 mánuði í atvinnulífinu. 

„Þrjár annir af fimm eru sameiginlegar með nemendum í húsasmíði. Í vetur taka nemendur meðal annars áfanga sem nefnist plötu- og grindarhúsgögn. Þar er unnið með spónlagðar plötur og gegnheilar grindur í burðarvirki, til dæmis í sófaborðum. Annar áfangi heitir sethúsgögn, þar sem stólar eru smíðaðir og einnig stólgrindur til bólstrunar. Einnig má nefna áfangann húsgagnaviðgerðir, þar sem nemendur læra að gera við húsgögn eins og nafnið gefur til kynna.“

Þrátt fyrir stigvaxandi aukningu nemenda síðustu árin segir Halldór erfitt að spá fyrir um frekari fjölgun á næstunni. „Við erum öll af vilja gerð en erum alltaf bundin af gamla meistarakerfinu þar sem nemendur þurfa alltaf að komast á samning hjá iðnmeistara og vinna í 18 mánuði. Þetta er mikill flöskuháls og handónýtt kerfi.“