Ís­lenskum nem­endum fækkar en er­lendum fjölgar

Þetta kemur fram í fréttatilkynningu Hagstofu Íslands. em þar kemur fram að nemendur í grunnskólum hafi verið 47.162 haustið 2024 og fækkað um 345 frá haustinu 2023.

Alls störfuðu 174 grunnskólar á landinu skólaárið 2024-2025 sem er fækkun um einn skóla frá fyrra ári. Einkareknir grunnskólar voru 13 talsins með tæplega 1.560 nemendur og hafa nemendur í einkaskólum á grunnskólastigi ekki verið fleiri. 

Í sérskólum reknum af opinberum aðilum, sem eru þrír talsins, stunduðu 186 nemendur nám.

Þá hefur fámennum grunnskólum farið fækkandi og minni skólum ýmist verið lokað eða þeir orðið deildir í stærri grunnskólum. Haustið 2004 voru 19 skólar með færri en 25 nemendur en haustið 2014 hafði þessum fámennustu skólum fækkað niður í 14. Þeir voru 10 haustið 2024.

Nemendum með erlent ríkisfang flöglar en íslenskt fækkar

Í tilkynningunni segir að nemendum sem hafa erlent tungumál að móðurmáli hafi fjölgað ár frá ári. Haustið 2024 hefðu 7.661 grunnskólanemendur erlent tungumál að móðurmáli, eða 16,2% nemenda. Hlutfallið hafi aldrei verið hærra. Vakin er athygli á að hluti þessara nemenda hefur einnig íslensku sem móðurmál. 

Algengasta erlenda móðurmál nemenda í grunnskólum sé pólska sem sé töluð af rúmlega 2.200 nemendum. Næstalgengasta erlenda tungumálið sé spænska, sem rúmlega sex hundruð börn hafi sem móðurmál. Tæplega 600 börn tali arabísku og lítið eitt færri hafi ensku sem móðurmál.

Grunnskólanemendum með erlent ríkisfang hafi einnig fjölgað frá fyrra ári og hafa aldrei verið fleiri. Þeir hafi verið 5.368 haustið 2024 og fjölgað um tæplega fjögur hundruð (7,9%) frá árinu áður. Nemendum með íslenskt ríkisfang hafi fækkað um 737 á milli áranna 2023 og 2024.