Snorri Steinn puttabrotinn

Snorri Steinn Guðjónsson byrjar tímabilið ekki vel í Danmörku en leikmaðurinn fór úr lið og virðist einnig hafa fingurbrotnað á æfingu hjá liði sínu GOG í vikunni.

GOG er nýliði í dönsku úrvalsdeildinni og fór vel af stað í fyrstu umferðinni er liðið bar sigur úr býtum gegn Nordsjælland, 35-23, en nú er staðan sú að leikstjórnandi liðsins verður frá næstu vikurnar og óvíst hvenær Snorri Steinn verður kominn aftur á völlinn.

„Þetta gerðist þegar ég átti síðasta skot æfingarinnar,“ segir Snorri Steinn í samtali við Fréttablaðið í gær. Snorri var upptekinn við eldamennsku þegar blaðamaður Fréttablaðsins náði tali af leikmanninum en eldhúsverkin höfðu vafist örlítið fyrir honum, enda mikið meiddur á fingri.

„Ég varð fyrir því óláni að fylgja skotinu of mikið eftir með þeim afleiðingum að puttinn á mér fór einhvern veginn í ennið á manninum fyrir framan mig.“

Snorri fór því næst úr lið á fingrinum og líklega brotnaði hann einnig lítillega.

„Það á eftir að skoða þetta betur og læknir liðsins hefur áframsent röntgenmynd til sérfræðings. Það er því ekki ljóst hversu lengi ég verð frá.“

GOG Håndbold komst á ný í úrvalsdeildina í ár eftir þriggja ára fjarveru en félagið varð gjaldþrota árið 2010 og varð að hefja keppni í dönsku C-deildinni eftir fjárhagsvandræðin. Snorri Steinn lék áður með liðinu á árunum 2007-2009.

„Ég átti von á því að liðið myndi styrkja sig meira fyrir komandi tímabil og það hafði verið gefið sterklega til kynna við mig þegar ég skrifaði undir við GOG,“ segir Snorri en leikmaðurinn gerði þriggja ára samning við félagið í lok árs 2012.

„Við ætlum okkur samt sem áður að komast í úrslitakeppnina og ég tel það raunhæft markmið. Þetta verður fróðlegur vetur fyrir félagið enda margir ungir strákar að stíga sín fyrstu skref í handboltanum.“

Snorri Steinn lék einnig áður með danska félaginu AG København, sem var stjörnum prýtt lið og eigandinn vel efnaður. Félagið fór í gjaldþrot en nú er komið nýtt risalið í Danmörku, KIF Kolding København.

„Þeir verða gríðarlega sterkir í vetur og eiga sennilega eftir að fara alla leið í dönsku deildinni. Ég sé ekkert annað lið eiga í raun möguleika í Kolding. Það er bara spurning hversu langt þeir fara í Meistaradeild Evrópu. Ég efast um það að liðið fari eins langt og við náðum í AG á sínum tíma en maður veit aldrei, þeir geta verið heppnir með drátt og annað.“