Tölurnar á móti Króatíu: 15-1 fyrir Króata í mörkum með lang­skotum

Slök vörn í fyrri hálfleik og hræðileg vítanýting komu í bakið á íslenska liðinu sem var nálægt því að vinna upp muninn en tókst ekki að koma alla leið til baka.

Króatar voru um tíma 9-0 yfir í mörkum skoruðum með langskotum í fyrri hálfleiknum og þeir voru með 79 prósent skotnýtingu í langskotum í fyrri hálfleik (11 af 14), hálfleik þar sem íslensku strákarnir nýttu aðeins sextíu prósent vítanna sinna (3 af 5).

Íslenska liðið fékk á sig nítján mörk í fyrri hálfleiknum sem er alltof mikið. Vörnin gekk betur í seinni hálfleiknum en gríðarlegur munur var á mörkum liðanna með langskotum.

Króatar skoruðu fimmtán mörk með langskotum á móti aðeins einu hjá íslenska liðinu.

Gísli Þorgeir Kristjánsson klikkaði á báðum skotum sínum í leiknum en var með sjö stoðsendingar og sex fiskuð víti.

Ómar Ingi Magnússon gerði meira en í síðustu leikjum en náði þó ekki að hjálpa nógu mikið í ógn fyrir utan teig. Hann átti tvö af fjórum vítaklikkum í leiknum en króatísku markverðirnir vörðu fjögur víti í leiknum.

Íslenska liðið fékk níu fleiri víti og var átta mínútum lengur, manni fleiri, en það skilaði ekki sigri.

Vísir fylgist vel með tölfræði íslenska liðsins á mótinu og hefur nú tekið saman þá leikmenn sem sköruðu fram úr í tölunum í þessum fyrsta leik Íslands á mótinu.

Hér fyrir neðan má sjá toppa íslenska liðsins í tölfræðinni.