Rottweiler á Þjóðhátíð

Enn bætast við þekktir tónlistarmenn sem stíga á svið á Þjóðhátíð í Eyjum því Erpur Eyvindarson og félagar í XXX Rottweiler hafa ákveðið að spila þar um verslunarmannahelgina.

Áður hafði hópur vinsælla flytjenda tilkynnt um komu sína, þar á meðal Skálmöld, Bjartmar Guðlaugsson, Sálin, Ásgeir Trausti, Bubbi Morthens, Páll Óskar, GusGus, Stuðmenn, Retro Stefson, Eyþór Ingi og Jónas Sigurðsson. Ingó Veðurguð mun jafnframt sjá um brekkusönginn í stað Árna Johnsen.

Gestir Þjóðhátíðar geta því valið úr góðum tónlistaratriðum og fá líkast til allir eitthvað fyrir sinn snúð.