Júragarðurinn ekki útdauður ennþá

Stórmyndin Jurassic Park var frumsýnd árið 1993 og sló þá rækilega í gegn. Nú eru uppi raddir um að fjórða myndin um Júragarðinn sé í bígerð. Empireonline.com flytur fréttir af þessu á vefsíðu sinni.



Áður hafa birst fréttir sem þessar og upphaflega var talið að kvikmyndin yrði frumsýnd sumarið 2014. Líklegra er þó að frumsýningardagur muni eiga sér stað ári síðar, eða 2015.

Fengist hefur staðfest að myndin verði í þrívídd og skrifa Colin Trevorrow og Derrick Connelly handritið að myndinni. Trevorrow mun einnig leikstýra myndinni, en hann leikstýrði síðast gamanmyndinni Safety Not Guaranteed frá árinu 2012.



Fyrsta myndin var í leikstjórn Stevens Spielberg og var handrit hennar byggt á samnefndri skáldsögu eftir Michael Crichton. Myndin skartaði Sam Neill, Laura Dern, Jeff Goldblum, Richard Attenborough, Ariana Richards, Joseph Mazzello, Martin Ferrero, Samuel L. Jackson og Bob Peck í helstu hlutverkum.