Kim og Kanye orðnir foreldrar

Stjörnuparið Kim Kardashian og Kanye West eignuðust stúlku á laugardaginn, um mánuði fyrir settan fæðingardag.



Þrátt fyrir það heilsast móður og barni vel, ef marka má Twitter-færslu Khloé Kardashian, eldri systur Kim.

„Ég get varla lýst kraftaverkinu sem nú er hluti fjölskyldunnar. Móðir og barn eru heilbrigð og hvílast. Við erum svo þakklát.“

Kim og Kanye hafa verið mikið í kastljósi fjölmiðla undanfarna daga en í síðustu viku sakaði kanadíska fyrirsætan Leyla Ghobadi rapparann um framhjáhald.

 

Hún sagðist hafa sængað margoft hjá kappanum frá því í júlí í fyrra en í ljós kom að ásakanirnar voru ekkert nema uppspuni frá rótum.

Hinir nýbökuðu foreldrar hafa ekki enn nefnt stúlkuna en slúðurmiðlarnir ytra telja það nánast öruggt að stúlkan hljóti nafn sem byrjar á bókstafnum „K“, eins og allir meðlimir Kardashian-fjölskyldunnar.

 

Við tökur á raunveruleikaþætti fjölskyldunnar, Keeping up with the Kardashians, sagðist Kim vilja borða fylgjuna í kjölfar fæðingarinnar. Ekki er enn vitað hvort Kim lét verða af því eða ekki.