Gátu opnað deild á fjórða degi

Blóðlækningadeild Landspítalans (LSH) var opnuð aftur á sunnudag, en deildinni var lokað á miðvikudag vegna bakteríusýkingar sem greindist í sjúklingi. Stofn bakteríunnar er ónæmur fyrir sýklalyfjum. Hann er landlægur á spítölum erlendis en sjaldgæfur hér á landi.

„Það voru ekki fleiri sem greindust með þessa bakteríu og hún ræktaðist hvergi í umhverfinu. Það var því hægt að opna deildina aftur á sunnudeginum. Þetta fór því eins vel og hægt var að þessu sinni," segir Hlíf Steingrímsdóttir, yfirlæknir á blóðsjúkdómadeild.

Hlíf hefur bent á sýkingu sem þessa í samhengi við húsnæðismál spítalans. „Þetta snýst um öryggi sjúklinga, sérstaklega í ljósi svona sýkingarvarna," sagði Hlíf í viðtali við Fréttablaðið á miðvikudag. Björn Zoëga, forstjóri LSH, ræðir húsnæðismál í ljósi undangenginna sýkingafaraldra á heimasíðu spítalans.

Hann segir ástandið endurspegla „það langvinna baráttumál okkar að endurnýja húsnæðið. Það bókstaflega verður að endurnýja húsnæðið og við verðum að leggja í þá vegferð saman, berjast fyrir því að aðstaðan á spítalanum verði mannsæmandi fyrir sjúklinga og ekki síður starfsfólk".