Vilja hýsa erlenda leikmenn á Hlíðarenda

Knattspyrnufélagið Valur vill fá að byggja þúsund fermetra viðbyggingu við mannvirki sín á Hlíðarenda. Félagið hefur sent beiðni um leyfi til Reykjavíkurborgar.

Viðbyggingin á að tengja gömul hús á svæðinu, íbúðarhús og fjós, við eldri hluta íþróttahússins. „Tillagan gerir ráð fyrir rúmum 1000 m² í einnar hæðar tengibyggingu og tveggja hæða framlengdu íþróttahúsi.“ Valsarar hyggjast innrétta minjasafn í fjósinu og sameiginlega setustofu í gamla íbúðarhúsinu.

Þá vilja Valsarar að ellefu gistirými verði í byggingunni. Skipulagsfulltrúi segir þau áform háð því að aðeins sé um skammtímagistiaðstöðu fyrir leikmenn að ræða, en í eldri fyrirspurn frá Val um sama mál kemur fram að í gegnum tíðina hafi leikmenn og gestir gist í íbúðarhúsinu og fjósinu. Þá hafi íslensk íþróttafélög marga erlenda leikmenn og þurfi að sjá þeim fyrir gistingu. „Er hugmyndin um þetta mannvirki beintengd þeirri staðreynd og myndi til lengri tíma litið spara háar fjárhæðir,“ segir í fyrirspurninni. -