„Blessunarlega var enginn heima“

Sólveig Arnarsdóttir, leikkona, býr við Urðarstíg rétt við húsið sem kviknaði í fyrir stundu. Þau hjónin voru heima þegar slökkviliðið mætti á staðinn.

„Það fer nú ekki framhjá manni þegar 3 sjúkrabílar, 3 slökkviliðsbílar og 2 lögreglubílar mæta í þessa litlu götu. Allir nágrannarnir fóru út en svo virtist sem slökkvliðið næði nokkuð fljótt að ráða niðurlögum eldsins,“ sagði Sólveig í samtali við Vísi.

Sólveig segir það eina sem hafi skipt þau máli hafi verið að athuga hvort einhver væri staddur inni í húsinu. Maður Sólveigar hafði gengið framhjá húsinu aðeins korteri áður en slökkviliðið mætti á svæðið, en þá var hvorki nokkurn reyk né eld að sjá.

„Þetta virðist hafa gerst virkilega hratt. Blessunarlega var enginn heima, nema litli kötturinn. Sjúkraliðarnir tóku strax til við að hlúa að honum og gengu vasklega til verks. Vonandi tókst að bjarga honum,“ segir Sólveig.

Sólveig segir um að ræða litla götu og svolítið eins og að búa í litlu þorpi að búa við Urðarstíginn.

„Við erum líka virkilega fegin að húsið hafi ekki hafa brunnið alveg niður til grunna þó það sé líklega illa skemmt. Svona timburhús fuðra náttúrulega fljótt upp. Við fjölskyldan höfðum einmitt aftengt reykskynjarann í síðustu viku af því hann var að trufla okkur við eldamennsku. Við settum hann beint aftur í samband núna, svona lagað er góð áminning um að hafa allt slíkt á hreinu.“