Lífið í Bragganum

Mæðgurnar frá Birtingaholti reka huggulegt kaffihús og leirvinnustofu í gömlum bragga frá stríðsárunum. Lífið kíkti í heimsókn til þeirra rétt fyrir utan Flúðir.

Erna Elínbjörg Skúladóttir er glaðlynd og ævintýragjörn kona en hún hefur meðal annars unnið sem kaffibarþjónn í Kólumbíu.



Fyrir tveimur árum útskrifaðist hún með BA-gráðu í keramikgerð með áherslu á myndlist. Nú stundar hún mastersnám í myndlist í Noregi en yfir sumartímann ræktar hún fjölskylduna á Íslandi og býr til postulín og kaffi í faldri perlu rétt fyrir utan Flúðir sem heitir Bragginn.

"Þetta var sameiginleg hugmynd hjá fjölskyldunni að það væri hægt að nýta þetta húsnæði, gera það upp og nota það sem til væri. Þetta var kartöflugeymsla áður fyrr sem afi minn byggði fyrir 40 árum.

Hann keypti gamlan herbragga og byggði hann inn í hólinn og nú rekum við kaffihús og vinnustofu þar,“ segir Erna Elínbjörg Skúladóttir.

Fyrir tólf árum hætti fjölskyldan í Birtingaholti kartöflurækt og leigði út landið undir kornrækt að fleira.

Í dag reka mæðgurnar Lára Hildur Þórsdóttir, Ásthildur Skúladóttir og Erna Elínbjörg Skúladóttir kaffihúsið saman og eru hráefnin að mestu leyti fengin úr sveitinni um kring. Að öðru leyti eru keyptar inn lífrænar vörur.

Erna Elínbjörg segir að það geti verið erfitt að fá almennilegan kaffibolla úti á landsbyggðinni og því sé kaffið fengið beint frá bónda í Kólumbíu.

Innan um kaffiilminn og hráfæðiskökurnar í Bragganum er unnið að postulíni sem stillt er upp eins og litlu ævintýri.

„Ég fann þennan litla karl á markaði í Danmörku og fannst svo sjarmerandi að setja þennan kúreka með fínlegu postulíni. Ég hef verið að nota gömul leikföng í myndlistina og mér finnst skemmtilegt að blanda saman sögum og ævintýrum. Ég vil helst nota framandi hluti og setja saman með gömlum nostalgískum hlutum,“ segir Erna Elínbjörg Skúladóttir.