Leigumarkaðurinn stendur ekki undir nafni, aðgerðir nauðsynlegar

Eygló Harðardóttir, félags- og húsnæðismálaráðherra, ávarpaði fjórða landsþing Starfsgreinasambands Íslands á Akureyri í gær. Í ávarpi sínu fór ráðherra meðal annars yfir stöðu húsnæðismála á Íslandi og sagði hana vera mörgum afar erfið.

Hún sagði margt ungt fólk eiga í erfiðleikum með að eignast húsnæði og að við núverandi aðstæður væri leigumarkaðurinn ekki skárri kostur. „Hann stendur alls ekki undir því nafni, enda óöruggur, eftirspurnin er langtum meiri en framboðið, leiguverðið himinhátt og oft er aðeins tímabundin skammtímaleiga í boði,“ sagði Eygló í ávarpi sínu.

„Það er alveg augljóst að staða húsnæðismála hér á landi er óviðunandi og það verður að ráðast í aðgerðir til að skapa þá umgjörð sem færir fólki raunhæfa valkosti í samræmi við getu og þarfir og tryggir nauðsynlegt húsnæðisöryggi.“ Þetta sagði Eygló vera mögulegt en til þyrfti samráð og samvinnu.

Hún sagði vinnu við framtíðarstefnu í húsnæðismálum vera hafna. Að verkefnið fælist meðal annars í því að kanna hvaða fyrirkomulag við fjármögnun almennra húsnæðislána væri hagkvæmust og gera tillögur um hvernig megi hrinda því í framkvæmd. Einnig yrði skoðað hvernig tryggja megi virkan leigumarkað og skilvirk félagsleg úrræði.

Hún sagðist ánægð með að starfsgreinasambandið vildi vinna með stjórnvöldum að lausn húsnæðisvandans. „Markmið þeirra sem eiga og reka leigufélög verður að snúast um aukið framboð hagkvæmra leiguíbúða til langtíma. Þess vegna hef ég sagt að verkalýðsfélögin séu öðrum betur fallin til þess að sinna þessu hlutverki.“

Eygló sagði að raunhæfur kostur væri að bjóða leigufélögum sem byggi án hagnaðarsjónarmiða byggingarlóðir á kostnaðarverði. „Með endurskoðun á nýju byggingarreglugerðinni sem nú stendur yfir er markmiðið að auka sveigjanleika og draga úr byggingarkostnaði. Þetta skiptir máli og eins ætti að vera mögulegt að bæta skattaumhverfi leigufélaga og fleiri leiðir eru eflaust færar ef viljinn er fyrir hendi,“ sagði Eygló.