Dansað gegn kynbundnu ofbeldi í Hörpu

UN Women á Íslandi, V-dagssamtökin og Lunch Beat hvetja vinkonur, vinir, mömmur, pabba, bræður og systur að mæta í hádeginu þann 14. febrúar í Hörpu þegar einn milljarður kvenna, karla og barna um allan heim munu dansa til að sýna konum og stúlkum sem hafa upplifað hafa ofbeldi vegna kyns síns stuðning og krefjast þess að kynbundið ofbeldi heyri sögunni til.

Í tilkynningu frá UN Women kemur fram að þó íbúar á Íslandi séu kannski ekki stór hluti af milljarði, þá getur almenningur hér á landi haft áhrif.

„Tökum þátt í því að láta jörðina hristast undan samtakamætti okkar," segir í tilkynningunni en tilgangurinn er sá að fá milljarð manna til þess að dansa og þannig stuðla að breyttri veröld þar sem ofbeldi gegn konum þrífst ekki.

Það er sjónvarpskonan Margrét Erla Maack sem mun opna viðburðinn og Lunch Beat teymið mun sjá til þess að draga fram það besta í fólki ásamt plötusnúðnum Margeiri, sem mun sjá til þess að dansinn duni. Aðgangur er ókeypis þökk sér tónlistarhátíðinni Sónar. Hægt verður að leggja frítt í bílastæði Hörpu á meðan dansgleðin stendur yfir.

Hér á eftir er svo yfirlýsing frá UN Women: Við neitum að búa í heimi þar sem:

· Nauðgunarmenning er normið

· Þar sem konum er kennt að hafa varann á sér þegar þær eru einar úti

· Þar sem ungar stúlkur eru þvingaðar og seldar í hjónabönd

· Þar sem konur eru útskúfaðar úr samfélaginu ef brotið er á þeim kynferðislega

· Þar sem konur eru myrtar ef þær eru taldar hafa kastað rýrð á heiður fjölskyldunnar

· Þar sem konum er refsað fyrir að kæra kynferðisbrot

· Þar sem refsileysi ríkir þegar konur eru niðurlægðar í netheimum

Sýnum samstöðum, dönsum af gleði og krafti fyrir mannréttindum kvenna, fyrir heimi þar sem konur og stúlkur þurfa ekki að líða ofbeldi vegna kyns síns.

Hér fyrir ofan má sjá myndband sem hefur verið gert í tilefni dagsins.