Flug á vegum CIA ekki flokkað sem ríkisflug

„Það var farið yfir óháða skýrslu sem birt var í síðustu viku þar sem meðal annars var talað um Ísland," segir Árni Þór Sigurðsson, formaður utanríkismálanefndar, um fund sem haldinn var í dag um fangaflug.

„Í skýrslunni er því haldið fram að íslensk stjórnvöld hafi heimilað flugið á sínum tíma og við vorum að fara yfir það með ráðuneytinu hvað væri hæft í þessu. Það er ljóst að þessi flugnúmer og flugvélar voru heimilaðar af stjórnvöldum en samkvæmt upplýsingum í skýrslu frá 2007 voru ekki taldar neinar vísbendingar um að í vélunum hefðu verið fangar."

Árni Þór segir hinn alþjóðlega Chicago-sáttmála um flugstarfsemi frá árinu 1944 sé flugi skipt í tvo flokka, almannaflug og ríkisflug.

„Ríkisflug eru þá vélar á vegum ríkisstjórna, herja eða jafnvel lögregluyfirvalda á meðan almannaflug eru bara almennar vélar. Ef um ríkisflug er að ræða þá þarf alltaf að sækja um leyfi frá íslenskum stjórnvöldum, jafnvel þó bara sé flogið um lofthelgi án viðkomu, en það á ekki við um almannaflugið. Þetta flug sem þarna er um að ræða á vegum CIA sýnist mér á öllu að hafi ekki verið flokkað sem ríkisflug."

En má þá ekki leiða líkur að því að fangaflugið hafi viljandi verið flokkað sem almannaflug til þess að ekki þyrfti að sækja um leyfi fyrir því?

„Það kann vel að vera, en því getur enginn svarað nema Bandaríkjamenn sjálfir."

Verið er að fara yfir skýrsluna í utanríkisráðuneytinu en ekki hefur verið ákveðið hvort henni verði svarað með einhverjum hætti.