Svíi mættur á Skipaskaga

ÍA hefur fengið Svíann Joakim Wrele á láni frá sænska úrvalsdeildarliðinu Halmstad.

Wrele er 22 ára gamall og getur bæði leikið á vinstri kanti og á miðjunni. Hann byrjaði einn leik og kom þrettán sinnum inn á sem varamaður hjá Halmstad á síðustu leiktíð. Þá lék Halmstad í næstefstu deild en komst upp í þá efstu eftir umspil.

„Þetta styrkir hópinn og gerir hann breiðari. Við erum búnir að vera að leita að þessu síðan Óli Valur (Valdimarsson) sleit krossband," sagði Þórður Þórðarson þjálfari ÍA við Fótbolta.net í dag.

Wrele er ekki kominn með leikheimild en gæti fengið hana fyrir fyrsta leik Skagamanna í Vestmannaeyjum á sunnudaginn.