Nauðgaði félaga sínum

Rúmlega tvítugur karlmaður var dæmdur í 15 mánaða óskilorðsbundið fangelsi í Héraðsdómi Reykjaness í dag fyrir að nauðga vini sínum. Hinn dæmdi átti afmæli þegar brotið átti sér stað í desember árið 2012. Sama kvöld viðurkenndi hann fyrir félögum sínum í afmælinu að hann væri tvíkynhneigður og tóku þeir því vel samkvæmt dómsorði.

Eftir að hafa farið út að skemmta sér skiluðu nokkrir félagar sér aftur heim til brotaþolans. Þar spjölluðu þeir í stutta stund en fóru svo að sofa. Brotaþolinn vaknaði svo við það að félagi hans var að hafa við hann munnmök en í fyrstu taldi hann að þetta væri kærasta sín. Hann áttaði sig þó fljótt á því að þetta var félagi sinn sem hafið komið út úr skápnum fyrr um kvöldið. Í dómsorði segir að brotaþolinn hefði fengið sjokk og ýtt honum frá sér. Hann sofnaði aftur en síðan endurtók þetta sig seinna um morguninn, brotaþolinn vaknaði aftur og nú byrsti hann sig við félagann sem lét þá af verknaðinum.

Brotaþolanum var nokkuð brugðið daginn eftir og síðar ákvað hann að kæra manninn fyrir kynferðisbrot. Sá hélt því fram að brotaþolinn hefði verið samþykkur því sem hann gerði, en dómurum þótti einsýnt að fórnarlambið hefði ekki getað veitt mótspyrnu vegna mikillar áfengisneyslu auk þess sem hann hafði neytt fíkniefna fyrr um nóttina.

Var svo litið til þess að gerandinn bað fórnarlambið tvívegis afsökunar á framferði sínu, og þótti dómurum það áleitin spurning hversvegna hann hefði gert það ef brotaþolinn hefði verið samþykkur munnmökunum. Ekki þótti rétt að skilorðsbinda refsingu mannsins vegna alvarleika brotsins. Hann þarf einnig að greiða fórnarlambi sínu 800 þúsund krónur í miskabætur.