Fjárlög marklítið plagg

Staða ríkisfjármála er mun verri en gefið hefur verið til kynna. Þetta kemur fram í Hagsjá hagfræðideildar Landsbankans. Síðastliðin þrjú ár hefur halli á rekstri ríkisins að jafnaði verið tvöföld sú upphæð sem Alþingi samþykkti í fjárlögum. Í ár eru líkur á að endanlegur halli verði margfalt meiri en niðurstöðutala fjárlaga. Fjárlög virðast því vera marklítið plagg.

Í nýlegu riti Ríkisendurskoðunar um framkvæmd fjárlaga kom sú skoðun stofnunarinnar fram að agi við framkvæmd fjárlaga hefði farið minnkandi og að hækkanir á fjárheimildum eftir samþykkt fjárlaga séu of miklar.

Nýjar tölur staðfesta slæmar spár

Tölur um fjármál ríkisins á fyrri hluta ársins 2013 sýna að halli á rekstri hefur verið 22,5 ma. kr. eða  8,3% af tekjum. Samsvarandi tölur fyrir fyrri árshelming í fyrra voru 18,3 ma. kr. halli sem var 7% af tekjum. Þó niðurstaða af rekstri fyrri árshelmings  þurfi ekki endilega að endurspegla lokaniðurstöðu ársins ætti að vera ljóst að endanleg niðurstaða verður langt frá því sem að var stefnt, enda hafa yfirlýsingar fjármálaráðherra bent í þá átt. Upphafleg áætlun stjórnvalda og Alþjóðagjaldeyrissjóðsins gerði ráð fyrir afgangi í ríkisfjármálum 2013. Því var síðan frestað til ársins 2014, og miðað við stöðuna nú hlýtur að teljast ólíklegt að það takist.

Skuldir ríkisins um síðustu áramót voru rétt tæpir 2.000 ma.kr. sem nemur um 118% af áætlaðri landsframleiðslu ársins. Skuldir höfðu aukist um 77 ma. kr. frá árinu áður. Vaxtabyrði ríkisins af þessum skuldum er gífurleg og nemur tvöföldum rekstrarkostnaði Landspítalans.

„Vitað er um marga lausa enda í fjármálum ríkisins og æskilegt væri að ný ríkisstjórn hæfi starf sitt við ríkisfjármál með því að festa þá enda,“ segir í tilkynningu frá hagfræðideild Landsbankans.