Slugsagjöldin „neyðar­úr­ræði“ og „ekki til að græða“

Helga Harðardóttir vekur athygli á atvikinu á Facbeookhópnum Vertu á verði - eftirlit með verðlagi. Þar segir hún frá því að hafa stokkið inn á Subway við N1 Hringbraut og í framhaldinu fengið 5750 króna rukkun í heimabankann sinn. Hún fékk þær skýringar frá N1 að um væri að ræða vangreiðslugjald sem rukkað ef fólk hefur dvalið lengur en 45 mínútur á bílastæði og láðst að skrá bílinn sinn í stæði.

Bílar myndaðir við komu og brottför

Helga vekur athygli á að við komu og brottför af bílastæðinu sé ekið framhjá myndavél sem tekur niður bílnúmer og þar með nákvæmlega hversu lengi bíl hefur verið lagt á stæðinu. 

„Ég skil ekki af hverju þau geta ekki bara rukkað mig eftir því. Ég er alveg tilbúin að borga það sem mér ber en ekki vangreiðslugjald upp á meira en fimm þúsund krónur,“ segir Helga í samtali við fréttastofu.

Hún sýni því fullan skilning að N1 þurfi að rukka fyrir bílastæði en spyr, fyrst fyrirtækið myndi allar komur og brottfarir, hvers vegna það geti ekki rukkað eftir því án þess að ökumenn hlaði niður forriti.

„Síminn minn er ekki þannig að ég geti hlaðið niður öppum og það er fullt af fólki sem er ekki með svoleiðis síma,“ segir Helga. 

Hún segist ekki tilbúin að greiða gjaldið enn, hefur gert Neytendasamtökunum viðvart og bindur vonir við farsæl málalok. 

Ekki laus stæði fyrir viðskiptavinina

Samkvæmt upplýsingum frá Jóni Viðari Stefánssyni forstöðumanni einstaklingssviðs N1 er bæði hægt að greiða fyrir bílastæði með því að hlaða niður bílastæðaforritinu Easypark og með því að greiða í þar til gerðum sjálfsala við bílastæðin.

Jón Viðar segir gjaldskyldu hafi verið komið á á stöðvum N1 við Borgartún og Hringbraut í vetur eftir að viðskiptavinir voru hættir að fá stæði við bensínstöðvarnar og fólk farið að leggja þar í langan tíma í senn til annarra erindagjörða en að versla við bensínstöðina.  

„Þetta var algjört neyðarúrræði hjá okkur, einfaldlega af því að það voru ekki laus stæði fyrir okkar viðskiptavini,“ segir Jón Viðar í samtali við fréttastofu. 

Hann segir N1 hafa reynt ýmislegt til að vinna bug á vandanum en ekkert gengið fyrr en gjaldskyldu var komið á. Fyrirkomulagið hafi gengið vel að nokkrum tilfellum undanskildum. Þau tilfelli hafi verið leyst með hlutaðeigandi án frekari vandamála. 

„Við höfum engan áhuga á að vera með gjaldskyldu en við vorum tilneydd til að gera þetta þarna. Við erum ekki að gera þetta til þess að græða á þessu heldur til að geta boðið upp á stæði,“ segir Jón Viðar sem bendir á að hvergi annars staðar á landinu er rukkað fyrir stæði við bensínstöðvar N1.

Uppbygging og viðhald kostnaðarsamt

Bílastæðamálin hafa verið áberandi liður í umræðunni að undanförnu. Síðast í gær sagði sjálfur atvinnuvegaráðherra frá því að hafa verið rukkuð um sex þúsund krónur í samskonar slugsagjald eftir að hafa lagt við Kirkjufell á Snæfellsnesi um helgina. Hún segist hafa þurft að fara í töluverða rannsóknarvinnu til að komast á snoðir um hvaðan rukkunin hefði komið. 

Freyr Ólafsson framkvæmdastjóri Parka brást við málinu í aðsendri grein á Vísi í dag. 

„Hvað gerir ráðherra í svona málum? Ráðherra míns geira, íslenskrar nýsköpunar, sem og ráðherra ferðaþjónustunnar, hæstvirtur atvinnumálaráðherra. Jú, ráðherra fer með þetta mál á opinberan vettvang og brigslar viðkomandi um ólöglega gjaldtöku. Ekki orð um að fjölskyldan hafi ekki greitt fyrir þjónustuna, heldur verður stormur vegna þess að mögulega hafi gjaldskylduskilti ekki verið alveg nægilega áberandi. Mögulega. Sönn saga!“

Hann bendir á að eigendur bílastæða hafi lagt kostnað í uppbyggingu á bílastæðunum, með tilheyrandi viðhaldi og öðrum kostnaði. Því gefi að skilja að eigendurnir vilji gjarnan að þeir sem noti þjónustuna greiði fyrir veruna og engin slugsagjöld séu nauðsynleg.

„En… rétt eins og við vitum, ef engir stöðumælaverðir hefðu gengið um götur við gjaldskyld stæði, þá hefðu líklega fleiri fallið í freistni og sleppt því að borga í stöðumælinn. Það er ástæða fyrir því að um allan heim er málum svona fyrir komið, virk eftirfylgni,“ skrifar Freyr.