Hugleikur hannaði 25 ára afmælismerki ADHD samtakanna

ADHD samtökin kynntu síðastliðin föstudag 25 ára afmælisendurskinsmerki samtakana sem skartar teikningu eftir Hugleik Dagsson. Það var leikarinn og tónlistarmaðurinn Magnús Jónsson sem nældi sér í fyrsta merkið.

Október er alþjóðlegur ADHD vitundarmánuður en slagorð hans er „Athygli – Já takk!“. Ellen Calmon, framkvæmdastjóri ADHD samtakanna kynnti tilgang vitundarmánaðar og aðra viðburði á afmælisárinu.

„Tilgangurinn með mánuðinum er að vekja athygli á ADHD og einnig að auka vitund almennings á þessum sjúkdómi. Með því að auka vitund almennings þá tekst okkur að eyða fordómum,“ segir Ellen. Hún hrósar Hugleiki Dagssyni í hásterkt fyrir framlag sitt til samtakana. „Hann hefur alltaf verið okkur innan handar og á mikið hrós skilið. Þessi teikning er mjög fyndin og skemmtileg.“

Endurskinsmerkin verða seld til styrktar ADHD samtökunum á afgreiðslustöðum N1 um allt land til 11. október 2013 á 1.000 kr.- Endurskinsmerkin verða einnig seld á skrifstofu ADHD samtakanna, Háaleitisbraut 13 og á vef samtakanna, www.adhd.is

Með hverju merki fylgir örbæklingur sem inniheldur helstu upplýsingar um ADHD eða athyglisbrest með ofvirkni. Í lok mánaðarins mun fara fram ráðstefna á Grand Hotel þar sem bæði innlendir og erlendir sérfræðingar munu halda fyrirlestur um sjúkdóminn.