Þjófur fær það óþvegið

Myndband af malasískri konu sem lemur þjóf sem birtist óvænt á mótorhjóli, og vill stela af henni handtöskunni, nýtur nú mikilla vinsælda á YouTube. Yfir 600 þúsund manns hafa skoðað myndbandið og þeir fá sannast sagna sitthvað fyrir sinn snúð.

Myndbandið, sem er úr öryggismyndavélum hússins en í góðum gæðum, sýnir þegar hin 28 ára gamla Germaine Yeap kemur heim, og leggur bíl sínum í stæðið. Þá koma aðvífandi tveir menn á mótorhjóli og annar hleypur að Yeap og vill rífa af henni veskið. Þá fýkur í Yeap og hún lemur þjófinn í klessu og óvíst hver hefðu verið afdrif hans ef ekki hefði verið fyrir félaga hans í glæpum, sem kemur aðvífandi og bjargar vini sínum frá öskuillri Germaine Yeap.

Germaine Yeap fylgdi þessu eftir með yfirlýsingu á netinu sem sjá má hér. En, víst má telja að þjófar leggi lykkju á leið sína þegar hún þessi er annars vegar.

Uppfært:

Á vef Metro er haft eftir Yeap að myndbandið sé sviðsett, og hluti af herferð til þess að vekja athygli á glæpum í Malasíu.