Á von á löngum kjaraviðræðum

Framkvæmdastjóri Samtaka atvinnulífsins telur að það muni taka töluverðan tíma að ná niðurstöðu í kjaraviðræðum. Aðilar vinnumarkaðarins funduðu með ríkissáttasemjara í gær en stefnt er að tólf mánaða skammtímasamningi.

Forystumenn Alþýðusambands Íslands og Samtaka atvinnulífsins komu saman til fundar hjá ríkissáttasemjara í gær vegna komandi kjaraviðræðna.

Þorsteinn Víglundsson, framkvæmdastjóri Samtaka atvinnulífsins, segir að kjaraviðræður muni taka töluverðar tíma. „Það er alveg ljóst að það ber töluvert á milli aðila eftir svona fyrstu yfirferð. Þannig að það má alveg gera ráð fyrir því að það muni taka töluverðan tíma að koma þessu saman,“ segir Þorsteinn.

Samið verður til tíu til tólf mánaða en gert ráð fyrir því að vinna að langtímasamningi hefjist um leið og þessari samningalotu lýkur.

Gylfi Arnbjörnsson, forseti ASÍ, segir mikilvægt að helstu forsendur langtímasamnings liggi fyrir í vor. „Við vijlum gjarnan að fyrir sumarleyfi í vor liggi fyrir niðurstöður bæði varðandi samskipti okkar við stjórnvöld þ.e. peningastefnu, húsnæðismál, vinnumarkaðsmál og líka það sem kemur að viðræðum við atvinnurekendur varðandi þessi sérmál þannig að það sé orðið nokkuð skýrt fyrir sumarleyfi hvers konar viðræður verða að hausti,“ segir Gylfi.