Rekinn frá Wetzlar

Kári Kristján Kristjánsson var ein af hetjum íslenska landsliðsins í leiknum gegn Slóveníu á miðvikudag. Þegar hann kom svo til Íslands í gær fékk hann þau tíðindi að félag hans, Wetzlar, væri búið að reka hann.

Kári Kristján fór í aðgerð í febrúar þar sem góðkynja æxli var fjarlægt úr baki hans. Í kjölfarið fór hann í veikindafrí hjá félaginu. Því fríi átti að ljúka í gær eða degi eftir leik Slóveníu og Íslands.

„Ég var að horfa á leikinn á netinu og ég datt næstum úr sófanum þegar ég sá að Kári var að spila fyrir Ísland," sagði Björn Seipp, framkvæmdastjóri Wetzlar.

„Við vorum í losti yfir því að sjá það og miður okkar yfir framkomu hans. Hann fékk leyfi til þess að fara í meðhöndlun á Íslandi. Hann var í engum rétti til þess að spila fyrir liðið. Það er bæði brot á trúnaði og á samningi. Fyrir vikið getum við ekki starfað með honum áfram og í raun höfum við ekki áhuga á því."

Kári var með samning við félagið til loka júní en þá hefur hann störf hjá danska félaginu Bjerringbro-Silkeborg. Miðað við núverandi stöðu verður hann því ekki á launum næstu mánuði.

„Það er búinn vera ákveðinn farsi í gangi hjá Wetzlar út af þessu máli. Hann kom til Íslands á mánudag og byrjaði að æfa með liðinu. Hann átti síðan símtöl við lækna Wetzlar þar sem hann tjáði þeim að hann væri orðinn góður og vildi komast af veikindalistanum," sagði Einar Þorvarðarson, framkvæmdastjóri HSÍ, en hann hafði ekki verið í neinum samskiptum sjálfur við forráðamenn Wetzlar.

„Svo eftir leikinn kemur bréf frá Wetzlar og þeir hafa síðan rekið málið í fjölmiðlum og farið grimmt fram. Þeir höfðu einnig samband við Handknattleikssamband Evrópu og sögðu Kára ekki vera tryggðan því hann væri enn á veikindalistanum sem læknar liðsins höfðu lofað Kára að koma honum af að því mér skilst."

Einar segir að þrátt fyrir það hafi hann verið löglegur með landsliðinu og þetta mál hafi ekki nein áhrif á úrslit leiksins í Slóveníu.

„Það var greinilega eitthvað vandamál þarna í samskiptunum. Ég geri mér ekki alveg grein fyrir af hverju því ég kom þar ekki nærri. Wetzlar vann þetta mál mjög hratt á meðan Kári var í flugi á leið heim til Íslands. Á meðan gat Kári ekki talað við neinn."

Einar segir það skrítið að ekki hafi komið nein mótmæli frá félaginu eftir að Kári talaði við lækna félagsins. Það hefði verið eðlilegt ef þeir settu sig upp á móti því að hann spilaði landsleikinn.

„Þeir hefðu átt að vita af því að hann hefði farið til Slóveníu í gegnum læknateymið sitt," sagði Einar en HSÍ mun aðstoða Kára í þessu máli eins og það getur.

Ekki náðist í Kára í gær þrátt fyrir ítrekaðar tilraunir.