Börkur vill 3.sæti á lista Sjálfstæðisflokksins

Börkur Gunnarsson, blaðamaður, rithöfundur og leikstjóri gefur kost á sér í 3. sætið í prófkjöri sjálfstæðismanna í Reykjavík 16. nóvember næstkomandi.

Í tilkynningu frá Berki segir að honum finnist mikilvægast að sjálfstæðismenn stilli upp góðum lista og komi sameinaðir til kosninga í vor. Hann segir að á síðustu árum hafi stefnuleysi einkennt stjórn borgarinnar. Pólitískir fulltrúar meirihlutans hafi fært ábyrgðina sífellt meira á herðar embættismanna. „En það er pólitíkusa að bera pólitíska ábyrgð ekki embættismanna,“ segir í tilkynningunni.

„Ég vil leggja áherslu á grunnþjónustuna, lága skatta og fjölskrúðuga borg með blómlegu menningarlífi. Það þarf ekki meiri steinsteypu í menningarlífið til að gera það öflugt, heldur hugmyndauðgi. Til að hafa áhrif innan borgarinnar vil ég að sjálfsögðu vera með besta flokknum Reykjavík. Besti flokkurinn í Reykjavík er Sjálfstæðisflokkurinn,“ segir í tilkynningunni.

Hann hefur verið í Sjálfstæðisflokknum frá 16 ára aldri og gegnt mörgum trúnaðarstörfum en hann var meðal annars í stjórn SUS þegar hann var yngri. Auk þess var hann í stúdentaráði fyrir Vöku um tveggja ára skeið. Börkur stjórnaði vef sjálfstæðismanna í borgarstjórnarkosningunum árið 2006 og hann var kosningastjóri sjálfstæðismanna í Reykjavík í síðustu kosningum.