Læknar verði áfram í björgunarþyrlum

Þyrlulæknar munu að öllum líkindum starfa áfram um borð í björgunarþyrlum Landhelgisgæslunnar. Uppsagnir þeirra áttu að taka gildi um áramótin.

„Ég er þeirrar skoðunar að þjónusta þyrlulækna sé mjög mikilvæg og þess vegna forgangsröðuðum við okkar fjármagni þannig að sú þjónusta yrði tryggð áfram,“ segir Hanna Birna Kristjánsdóttir innanríkisráðherra en Landhelgisgæslan heyrir undir innanríkisráðuneytið.

Mikil óvissa hefur ríkt um stöðu þyrlulækna á árinu. Í júní síðastliðnum var öllum þyrlulæknum Landhelgisgæslunnar sagt upp vegna fjárskorts en á endanum náðist samkomulag á milli stjórnvalda og Landspítalans um að fresta uppsögnunum.

Í fjárlagafrumvarpi ríkisstjórnarinnar fyrir næsta ár er lögð fram fimmtíu milljóna króna hækkun á fjárveitingum til Landhelgisgæslunnar og er hún eyrnamerkt þyrlulæknum. Að auki skilaði embætti landlæknis sérstöku áliti til innanríkisráðherra í fyrradag þar sem þjónusta læknanna er sögð bráðnauðsynleg.

Landhelgisgæslan greiðir um 45 milljónir króna á ári til Landspítalans vegna þyrlulækna. Fimm læknar skipta með sér vöktum, á meðan þeir sinna öðrum störfum á spítalanum, og hver þeirra fór að meðaltali í um þrjú útköll á mánuði á árinu 2012.

Landhelgisgæslan greiddi því um 750 þúsund krónur á mánuði fyrir hvern lækni á árinu, en inni í þeirri upphæð eru einnig lyf og búnaður læknanna.

Hanna Birna segir þjónustuna vissulega dýra en að ráðuneyti hennar hafi skoðað hvort sparnaður hlytist af því ef samningi við þyrlulækna yrði sagt upp.

„Þá hefði þurft að hafa annan einstakling um borð í þyrlunum og sparnaður af því hefði verið óverulegur,“ segir hún.

Viðar Magnússon, yfirlæknir þyrlusveitarinnar og læknir á Landspítalanum, hafði ekki heyrt af ákvörðun ráðuneytisins þegar Fréttablaðið talaði við hann í gær.

„Ef þetta reynist rétt þá get ég ekki verið annað en verið ánægður með að menn hafi séð gagnsemi þessarar þjónustu,“ segir Viðar.