Segja miðaldadómkirkjuna spilla Skálholti til framtíðar

Um helgina var haldið málþing um framtíðarsýn í Skálholti út frá minjavernd, ferðaþjónustu og skipulagi. Þar var meðal annars rætt um staðsetningu tilgátuhúss miðaldadómkirkju sem einkaaðili áformar að byggja í Skálholti.

„Þær hugmyndir sem hafa komið fram eru of nálægt Skálholtsstað,“ segir  K. Hulda Guðmundsdóttir, skipuleggjandi málþingsins. „Því miður hefur verið leynd yfir hugmyndum framkvæmdaaðila um staðsetningu hússins.“ 



Séra Kristján Valur Ingólfsson, vígslubiskup í Skálholti, segir það algjört lykilatriði í þessu máli hvar tilgátukirkjan verður byggð. „Það liggur ekki fyrir, en það lítur út fyrir að það sé vilji til að byggja nálægt kirkjunni.“

Spurður um hvaða áhrif bygging tilgátukirkjunnar myndi hafa á Skálholtsstað segir séra Kristján Valur: „Ef hún yrði algjörlega á þessari þúfu myndi það breyta mynd staðarins og það væri ekki gott. En það eru fleiri mögulegir byggingarstaðir á þessu landi.“

„Margir segja að þetta myndi spilla Skálholti til framtíðar,“ segir séra Kristján Valur. Hann hefur fundið fyrir miklum hita í umræðum um þetta mál, bæði meðal heimamanna og annarra.

Samkvæmt K. Huldu Guðmundsdóttur, skipuleggjanda málþingsins, myndi kirkja ofan í Skálholtsstað breyta upplifun fólks af staðnum. Þetta myndi flytja aukinn hluta ferðamanna sem eru á leið um Gullna hringinn til Skálholts.

Hulda segir að það sé mikilvægt að vanda sérstaklega til varðandi deiliskipulag. Hún leggur áherslu á að það sé mikilvægt að fornleifaskráning fari fram áður en ráðist er í framkvæmdir. Fornleifaskráning er skilyrði fyrir því að deiliskipulag verði unnið og síðan er samþykkt deiliskipulag forsenda þess að byggja megi hús.

Vísir talaði einnig við Guðjón Arngrímsson sem er í forsvari fyrir hugmyndina um miðaldadómkirkju í Skálholti. „Algjör misskilningur,“ segir Guðjón um að hugmyndin sé að byggja tilgátukirkjuna nálægt Skálholtskirkju. 

„Þetta er bara sérverkefni. Samkomulagið við kirkjuna gengur út á leigu á lóð. Þær hugmyndir sem hafa verið í gangi ganga út á að þetta yrði í tölvuverðri fjarlægð frá núverandi kirkju og að heildarmynd staðarins haldist í núverandi horfi.“