"Var ekki í rassgarnarenda Bandaríkjamanna“

Fyrrverandi utanríkisráðherra segir það af og frá að íslensk stjórnvöld hafi átt í nánu samstarfi við Þjóðaröryggisstofnun Bandaríkjanna eins og spænska blaðið El Mundo fullyrðir. Fyrirspurn utanríkisráðuneytisins um hvort njósnað hafi verið um íslenska stjórnmálamenn hefur verið send til Washington.

Samkvæmt frétt blaðsins sem birt var í gær er Ísland eitt af þeim 23 ríkjum sem vinna náið NSA að gagnaöflun. Sagt er að þetta komi fram í gögnum frá uppljóstraranum, Edward Snowden. Reyndar mun það vera túlkunaratriði hvort hér sé um að ræða þær þjóðir sem Bandaríkin telji að líkleg séu til samstarfs eða hvort þau hafi unnið með NSA.Gunnar Bragi Sveinsson, utanríkisráðherra sagði í hádegisfréttum RÚV í dag að allt yrði gert til að komast til botns í málinu. Sú vinna myndi hefjast strax í dag eða á morgun.

Össur Skarphéðinsson var utanríkisráðherra frá 2009 en lét af embætti við stjórnarskiptin í vor. Hann kannast ekki við að stjórnvöld hafi átt í neinu samstarfi við NSA."Ekki neitt. Ég veit engin dæmi þess að í utanríkisráðuneytinu hafi átt í neinu samstarfi við NSA. Og satt að segja var ég nú á þeim túnbleðli að ég var víðsfjarri því að hægt sé að segja að Ísland hafi verið upp í rassgarnarenda þessara stofnana Bandaríkjanna," segir Össur.

Össur telur engar líkur á að meint samstarf hafi getað átt sér stað án þess að utanríkisráðuneytið og innanríkisráðuneytið hefðu um það vitneskju.

„Ég tel að það hefði ekki verið hægt að eiga neitt slíkt samstarf á síðasta kjörtímabili án þess að ég eða þáverandi innanríkisráðherra, Ögmundur Jónasson, myndu af því vita.“

Allt stefnir í að njósnastarfsemi NSA komi til með að hafa slæm áhrif á samskipti Bandaríkjanna og fjölmargra Evrópuþjóða. Utanríkisráðuneytið óskaði eftir upplýsingum hjá bandaríska sendiráðinu á Íslandi um hvort njósnað hafi verið um íslenska stjórnmálamenn. Sendiráðið staðfesti við fréttastofu að erindið hafi borist og það áframsent til Washington. Viðbragða þaðan er nú beðið.