Menn, tæki og hús á kafi í grútardrullu

Aðstæður til hreinsunarstarfa í Kolgrafafirði eru erfiðar vegna hlýinda og rigningar. Allt er á kafi í grút og lyktin hrikaleg jafnt utan- sem innandyra. Tilraunir til að smala síld úr firðinum báru ekki árangur. Þykkt grútarlag litar fjörðinn gulan.

Aðstæður til hreinsunarstarfa í Kolgrafafirði hafa snarversnað vegna hlýinda og rigninga undanfarna daga. Tíu til fimmtán þúsund tonn hafa þegar verið grafin niður í fjöruna og nokkur hundruð tonn af grúti verið flutt til urðunar. Tilraunir Hafrannsóknastofnunar til að fæla burt lifandi síld og háhyrninga úr firðinum báru ekki árangur.

Bjarni Sigurbjörnsson, bóndi á Eiði í Kolgrafafirði, segir aðstæður skelfilega erfiðar í Kolgrafafirði. „Það er allt að fara á kaf í drullu og viðbjóði. Veðurfarið vinnur gegn okkur. Það er allt útatað; menn, vélar og hús og lyktin ætlar allt að drepa,“ segir Bjarni.

Kolgrafafjörður er rjómagulur á litinn vegna grútarmengunar að stórum hluta, segir Bjarni. Fjara sem var hreinsuð á miðvikudag er aftur orðin pökkuð af dauðri síld. „Þetta er nokkuð sem við áttum von á; við vissum af meiru í firðinum. En ég fullyrði að búið er að urða um fimmtán þúsund tonn nú þegar, svo það gengur verulega á þetta.“

Sérfræðingar Hafrannsóknarstofnunar verið við vöktun í firðinum, meðal annars til að meta umfang dauðrar síldar á botni fjarðarins. Sérfræðingar Hafró hófu á fimmtudag tilraunir til þess að fæla lifandi síld og hval út úr firðinum með hljóðmerkjum.

Þorsteinn Sigurðsson, sviðsstjóri hjá Hafró, segir að tilraunirnar hafi ekki borið árangur og ljóst að síldinni verður ekki smalað með þeim aðferðum sem hafa verið prófaðar til þessa. Þá vinnur Hafrannsóknarstofnun að áætlun um rannsókn á orsökum síldardauðans og hefur átt í samræðum við Vegagerðina um hugsanleg áhrif þverunar fjarðarins í því sambandi.

Róbert Arnar Stefánsson, forstöðumaður Náttúrustofu Vesturlands, fór til eftirlitsstarfa í Kolgrafafirði og víðar á svæðinu í vikunni og sá tuttugu erni. Þeir virtust allir vel fleygir og því ekki grútarblautir, án þess að hægt sé að útiloka það. „Fuglalífið á svæðinu, sérstaklega í Urthvalafirði [Kolgrafafjörður utan brúar], er ævintýralega mikið. Síðdegis þennan dag voru líklega 20 þúsund fýlar á Urthvalafirði og þúsundir máfa og annarra fugla. Nokkur þúsund máfar og tvö til þrjú þúsund æðarfuglar voru innan brúar,“ er mat Róberts sem segir að vesturhluti Kolgrafafjarðar innan brúar, frá brú inn að Eiðisstöpum, sé mjólkurlitaður og gruggugur, sem minni helst á frárennsli frá fiskvinnslu.

svavar@frettabladid.is