Taka á móti færeyskri þungarokkssveit

"Þetta er samvinnuverkefni milli íslenskra og færeyskra þungarokkssveita sem Skálmöld startaði árið 2011. Við höldum tvenna tónleika í Reykjavík og svo er ferðinni heitið á Eistnaflug," segir Gyða Hrund Þorvaldsdóttir, gítarleikari.

Hljómsveit hennar, Angist, hyggur á tónleikaferðalag um Ísland og Færeyjar ásamt færeysku þungarokkssveitinni Earth Divide. Ferðalagið hefst á mánudag og lýkur með tónleikum á G! Festival.

"Tumi Snær, trommarinn okkar, keppti einu sinni í sundi í Færeyjum á sínum yngri árum og systkinin í bandinu, Edda og Haraldur, hafa komið í höfnina. Ég er sú eina í hljómsveitinni sem hefur ekki komið til Færeyja og ég hlakka ótrúlega mikið til. Það er víst rífandi stemning á G! Festival," segir hún.

Hljómsveitirnar tvær sjá um allt skipulag sjálfar, en verkefnið er að hluta til styrkt af Kraumi og Tónlistarsjóði.

"Við verðum saman 24/7 næstu tvær vikurnar. Þeir gista hjá okkur og við hjá þeim," segir hún og bætir við: "?Við höfum ekki hitt strákana í Earth Divide, en þeir eru mjög skemmtilegir á internetinu.?"

Tónleikar hljómsveitanna fara fram í TÞM annað kvöld, á Gauknum á miðvikudag og á tónlistarhátíðinni Eistnaflugi um helgina.