Erla Tryggvadóttir spurð spjörunum úr

Nafn: Erla Tryggvadóttir

Aldur: 34 ára.

Starf: Viðskiptastjóri hjá auglýsingastofunni Brandenburg.

Hvern faðmaðir þú síðast?

Ég faðmaði kærastann minn áður en hann hélt af stað á æskustöðvarnar í Stykkishólmi.

En kysstir?

Ég smellti kossi á kærastann við sama tilefni – hann á nú alltaf skilið að fá koss þessi elska.

Hver kom þér síðast á óvart og hvernig?

Vinnufélagarnir koma mér alltaf skemmtilega á óvart, sérstaklega vegna þess hvað þeir eru alltaf sjúklega fyndnir og skemmtilegir. (Hæ, Brandenburg!)

Hvaða galla í eigin fari ertu búin að umbera allt of lengi?

Ég á það til að vera óstundvís, því miður, en ég held og vona að með árunum hafi mér tekist að bæta mig. (Hæ, Helga!)

Ertu hörundsár?

Ég átti það til þegar ég var yngri, og jafnvel langrækni! En eitt af því besta við að eldast er þroskinn og að ná að lyfta sér yfir hluti sem skipta engu máli, svona þegar allt kemur til alls.

Dansarðu þegar enginn sér til?

Algjörlega! Og syng hástöfum þegar þannig liggur á mér.(Hæ, Finnur!)

Hvenær gerðirðu þig síðast að fífli og hvernig?

Ég geri mig reglulega að fífli og hef gaman af því! Ég reyni að taka sjálfa mig ekki of hátíðlega.

Hringirðu stundum í vælubílinn?

Já, oft! Ég er með hann á speed-dial.

Tekurðu strætó?

Ég geri það ekki, því miður.

Hvað eyðirðu miklum tíma á Facebook á dag?

Alltof miklum. Ég þori bara alls ekki að taka saman hversu miklum tíma. Úff.

Ferðu hjá þér þegar þú hittir fræga eða heilsarðu þeim?

Nei, ég fer alls ekki hjá mér. Ég knúsa þá sem ég þekki; sama hvort þeir eru frægir eða ekki.

Lumarðu á einhverju sem fáir vinir þínir vita um þig?

Tja, ég get enn farið í splitt og spíkat. Vissuð þið það?

Hvað ætlarðu alls ekki að gera um helgina?

Hitta leiðinlegt fólk og láta mér leiðast, bara alls ekki. Ég stefni á að hitta skemmtilegt fólk og njóta alls þess besta sem íslenskt sumar býður upp á. Er það ekki nokkuð skothelt plan?