Áratugur síðan spáin gekk eftir

Þótt Þórsurum hafi verið spáð neðsta sætinu í Pepsi-deild karla í sumar eru litlar líkur á að þeir hafni þar ef horft er aftur í tímann. 

Fara þarf áratug aftur í tímann til þess að finna tímabil þar sem þjálfarar og fyrirliðar liðanna í efstu deild spáðu rétt fyrir um hvaða lið myndi hafna í botnsæti deildarinnar.

Í töflunni hér fyrir neðan má sjá hvaða liðum þjálfarar og fyrirliðar spáðu Íslandsmeistaratitli og botnsæti undanfarin áratug. Þau ár þar sem spáin gekk eftir eru lituð gulum lit.

Í fjórum af síðustu tíu skiptum gekk spáin eftir hvað varðaði Íslandsmeistara. Hins vegar hefur gengið erfiðar að spá fyrir um neðri hlutann. Voru það síðast Valsmenn árið 2003 sem höfnuðu í neðsta sæti líkt og spáin hafði sagt til um.

Rétt er að taka fram að þótt spá forráðamanna um botnliðið gangi sjaldnast eftir hafa liðin sem spáð er neðsta sæti oftar en ekki farið niður. Það var uppi á teningnum síðast í fyrra þegar Selfoss hafnaði í næstneðsta sæti og féll í 1. deild. Raunar hefur liðið, sem var spáð botnsætinu undanfarin þrjú ár, þurft að sætta sig við fall úr deildinni.