Grunaði bóndinn er ekki faðirinn

Rúmlega áttræður bóndi af Snæfellsnesi, sem grunaður er um að hafa níðst á stjúpdóttur sinni áratugum saman, er ekki faðir þrítugrar dóttur hennar. Þetta er niðurstaða faðernisprófs sem lögreglan á Akranesi lét gera í þágu rannsóknar málsins, samkvæmt heimildum Fréttablaðsins.

Ekki er útlit fyrir að úr því fáist skorið hver er faðir dótturinnar. Konan, sem er um fimmtugt, hefur greint frá því að tveir bræður bóndans hafi einnig misnotað sig þegar hún bjó á sveitabænum á Snæfellsnesi ásamt stjúpföður sínum og öðrum bróðurnum. Þeir létust hins vegar báðir fyrir áratug.

Bóndinn sætir nú nálgunarbanni og er bannað að koma nálægt stjúpdóttur sinni fyrrverandi eða hafa samband við hana með nokkrum hætti. Áður hafði hann setið í gæsluvarðhaldi frá því í janúar og fram í byrjun apríl.

Konan er verulega greindarskert vegna heilaskaða sem hún hlaut í æsku. Málið hófst í ársbyrjun þegar ófeðruð dóttir konunnar uppgötvaði að maður hennar hafði beitt móður hennar kynferðislegu ofbeldi um nokkurt skeið. Þau höfðu öll búið saman á Vesturlandi. Tengdasonur konunnar viðurkenndi brotin og dóttirin hefur slitið við hann samvistum.

Samkvæmt heimildum blaðsins var þætti tengdasonarins vísað til Ríkissaksóknara fyrir um mánuði en engin ákæra hefur verið gefin út á hendur honum enn.

Við yfirheyrslur hjá lögreglu í tengslum við þau brot greindi konan frá ofbeldi fyrrverandi stjúpföður síns, bóndans á Snæfellsnesi. Rannsókn á þætti hans er á lokastigi hjá lögreglu.