Tómatarækt í Grindavík verði stærri en öll gróðurhús landsins samanlögð

Gangi áform hollensks félags eftir rís í Grindavík gróðurhús sem verður stærra en öll gróðurhús landsins samanlögð að sögn bæjarstjórans. Rækta á lífræna tómata sem fluttir verða á markað í Bretlandi. Íbúafundur um málið er kominn á dagskrá.

„Þetta er stærra en öll gróðurhús landsins til samans,“ segir Róbert Ragnarsson, bæjarstjóri Grindavíkur þar sem hollenskt félag falast eftir lóð undir 150 þúsund fermetra gróðurhús til tómataræktar.

Að sögn Róberts hafa Hollendingarnir þegar aflað sér viljayfirlýsingar frá kaupanda og tómataræktanda en vantar að ganga frá viljayfirlýsingum við Grindavík og HS Orku. Hann segir fyrirtækið eiga gróðurhús í Þýskalandi og Hollandi og leigja út til ræktenda.

„Maður veit aldrei hvað gerist en þeir eru með áhugaverða fjárfesta sem bíða. Þeir eru að semja við HS orku um orkuna og við erum með 27 hektara lóð fyrir þá rétt vestan við bæinn,“ segir Róbert. Á sama svæði undirbúi Íslensk matorka eldi á bleikju og fiskinum tilapíu. „Það er ekki síst spennandi að þessir tveir aðilar eru að skoða hvort þeir geti nýtt hrat hvor frá öðrum.“

Tómatarnir verða eingöngu til útflutnings. „Þeir ætla að rækta ýmsar tegundir af tómötum og flytja til Bretlands. Þeir horfa til þess að geta framleitt lífræna tómata án skordýreiturs með endurnýjanlegri orku. Það er verið að keppa við tómata sem eru ræktaðir með eitri í Túnis og á Spáni,“ segir Róbert.

Að sögn Róberts hafa menn ýmsar spurningar, meðal annars um ljósmengun og vatnsþörf. „Við höfum miklar áhyggjur af ljósmengun en þeir segjast getað skermað 95 prósent af henni. Þeir þurfa sáralítið af vatn vegna þess að það á að hirða regnvatn af þakinu sem þeir safna saman í laugar og sía,“ segir bæjarstjórinn.

Áætlað er að tómataræktunin skapi 100 til 120 störf og færa sveitarfélaginu auknar útsvarstekjur og fasteignagjöld. „Ég ímynda mér að þriðjungur starfsmanna búi í Grindavík,“ segir Róbert.

Halda á íbúafund um málið 16. október. „Við höfum oft fengið til okkar erlenda aðila og þeir fara jafn hratt og þeir koma en það hefur enginn verið til í að halda íbúafund áður,“ segir bæjarstjórinn.