Betra aðgengi fyrir viðskiptavini í móttöku 365

„Aðgengi viðskiptavina er orðið mun betra og nú getum við sýnt vörur og þjónustu fyrirtækisins enn betur,“ segir Jón Laufdal, sölustjóri 365 miðla, en miklar endurbætur voru gerðar á móttöku og afgreiðslu fyrirtækisins í Skaftahlíð 24 fyrir skömmu. „Markmiðið með breytingunum var að geta tekið betur á móti viðskiptavinum okkar og kynnt þeim betur en áður þær vörur og þjónustu sem 365 miðlar bjóða upp á,“ útskýrir Jón.

Breytingarnar, sem hafa tekið um tvo mánuði, breyta móttökunni í nokkurs konar verslun, þar sem tekið er á móti öllum viðskiptavinum 365 miðla. „Þarna fer fram sala á allri okkar þjónustu eins og áskrift að sjónvarpsstöðvunum okkar, móttaka auglýsinga fyrir Fréttablaðið og sjónvarpsmiðlana, afgreiðsla Miði.is, ásamt annarri þjónustu,“ bætir Jón við. Mikið er um að vera hjá fyrirtækinu á næstunni og mun sjónvarpssviðið til dæmis bjóða upp á fjölbreytta og skemmtilega dagskrá í jólamánuðinum.

Afgreiðsla 365 miðla er opin alla virka daga frá klukkan 9 til 18 og á laugardögum frá 11 til 16.