Við Garðar eigum eftir að skora slatta

Pepsi-deildin fór af stað í gær og í kvöld mætast á KR-vellinum tvö af þeim liðum sem er spáð hvað bestu gengi í sumar. Veigar Páll Gunnarsson og félagar í Stjörnunni heimsækja þá hans gömlu félaga í KR, en það er örugglega öllum alvöru KR-ingum í fersku minni þegar Veigar Páll sá öðrum fremur til þess að 24. Íslandsmeistaratitilinn kom í Vesturbæinn árið 2003.

Vanur að vinna á KR-vellinum

Veigar Páll snýr nú heim eftir áratug í atvinnumennsku í Noregi og Frakklandi og byrjar á sínum gamla heimavelli. „Ég er vanur að vinna á KR-vellinum,“ segir Veigar Páll í léttum tón. „Ég spilaði þarna í tvö ár, það er gaman að spila þarna og ég lít eiginlega þannig á þetta að ég byrji á heimaleik,“ segir Veigar.

Hann segir að það hafi tekið tíma að koma sér í gang. „Það byrjaði rosalega brösuglega hjá mér en það var vegna þess að ég ákvað að taka mér rúmlega eins og hálfs mánaðar frí til þess að hreinsa hausinn. Mér finnst ég vera kominn í fínt stand núna og formið verður bara betra með tímanum. Maður er klár í sumarið.“

Það er engin meistarapressa í Garðabænum þrátt fyrir að Veigar Páll sé kominn heim.

Skynsamlegar spár

„Ég held að þessar spár sem ég hef verið að kíkja á séu bara skynsamlegar hjá spámönnum. Fjórða til fimmta sætið er kannski eðlilegt en við vitum að ef þetta byrjar að ganga vel frá fyrsta leik erum við með nógu gott lið til þess að komast hærra,“ segir Veigar Páll.

Sóknarleikurinn ætti að vera í góðu lagi enda vandfundin önnur eins sóknarlína í deildinni (Veigar Páll, Garðar Jóhannsson, Halldór Orri Björnsson, Kennie Chopart) en þótt skemmtanagildið hafi verið mikið í leikjum Stjörnuliðsins hefur liðið oftast varist illa.

„Ég held að við séum búnir að styrkja vörnina verulega með því að fá þessa tvo Dani, miðvörðinn Martin Rauschenberg og svo Michael Præst sem er afturliggjandi miðjumaður. Præst bindur vörnina og miðjuna saman og hann er gríðarlega mikilvægur. Maður sér að hann er með reynslu og veit alveg hvernig hann á að spila það hlutverk. Hann talar mikið og ég held að hann eigi eftir að binda okkur saman,“ segir Veigar Páll, en hann fær síðan góða hjálp í sóknarleiknum.

Gott að spila með Garðari

Vinirnir og æskufélagarnir Veigar Páll og Garðar Jóhannsson spila nú hlið við hlið á ný. „Ég og Garðar vitum alveg hvernig á að skora mörk og eigum eftir að skora slatta af mörkum. Mér finnst rosalega gott að spila með honum. Við finnum hvor annan vel og ég hef trú á því að við eigum eftir að standa okkur vel, gamlingjarnir þarna frammi,“ segir Veigar.

„Ég býst við því af sjálfum mér að ég eigi eftir að eiga þátt í flestum af okkar mörkum. Það hefur verið þannig úti í Noregi og ég vona ég geti haldið því áfram hérna heima. Það gekk gríðarlega vel hjá mér hjá KR enda var maður líka keyptur út eftir það. Ég er orðinn tíu árum eldri en engu að síður er ég í ágætis standi og líður vel. Ég býst við einhverju af mér í sumar,“ segir Veigar. Hann á einnig von á skemmtilegum söngvum um sig frá Silfurskeiðinni.

„Ég held að þeir séu byrjaðir að semja eitthvað þannig að ég bíð bara spenntur eftir því að heyra hver útkoman verður þegar dómarinn flautar leikinn á. Það er oft talað um að áhorfendurnir séu tólfti maðurinn á vellinum og Silfurskeiðin sér til þess að það er svoleiðis hjá Stjörnunni. Það er rosalegt að heyra í þeim enda er ekki þögn uppi í stúku í eina sekúndu,“ segir Veigar Páll, fullur tilhlökkunar fyrir fyrsta leik.

Sportið á Vísi er komið á Facebook. Fylgstu með.