Íslandsmeistararnir hafa ekki unnið fyrsta leik í sex ár

Íslandsmeistarar FH hefja titilvörnina í kvöld þegar þeir taka á móti Keflavík á Kaplakrikavelli en leikurinn hefst klukkan 19.15 og verður í beinni textalýsingu á Vísi. Það hefur gengið illa hjá ríkjandi Íslandsmeisturum í fyrstu umferðinni undanfarin ár.

Síðasta meistaraliðið til að vinna fyrsta leik árið eftir var lið FH sem vann 3-2 sigur á Akranesvelli í 1. umferð 2007. FH-ingar voru þá að vinna fyrsta leik í titilvörn þriðja árið í röð.

Frá og með árinu 2008 hafa Íslandsmeistararnir hinsvegar ekki náð að vinna fyrsta leik og aðeins náð í tvö stig af fimmtán mögulegum stigum (13 prósent). KR-ingar gerðu 2-2 jafntefli á heimavelli við Stjörnuna í fyrra og Blikar töpuðu 2-3 á móti KR í fyrsta leik árið áður.

Varnarleikurinn hefur verið að hrjá meistaranna í fyrsta leik undanfarin fimm sumur sem sést best á því að meistararnir hafa fengið á sig 13 mörk í þessum fimm leikjum þar af tvö mörk eða fleiri í fjórum leikjanna.

FH-ingar mæta líka Keflvíkingum í kvöld en þeir unnu einmitt Íslandsmeistarana í fyrsta leik 2008 og 2009.

Fyrsti leikur í titilvörn 2008-2012:

KR 2012: 2-2 jafntefli á móti Stjörnunni á heimavelli

Breiðablik 2011: 2-3 tap á móti KR á heimavelli

FH 2010: 2-2 jafntefli á móti Val á útivelli

FH 2009: 0-1 tap á móti Keflavík á útivelli

Valur 2008: 3-5 tap á móti Keflavík á útivelli

Samtals: 5 leikir, 2 stig, markatala: 9-13 (-4).