Laus við kúrekahatt og svipu í rúminu daginn fyrir orrustu

Í nýju viðtali við bardagakappann Gunnar Nelson er hann meðal annars spurður út í það hvort hann sleppi því að stunda kynlíf fyrir bardaga sína.

„Ég held að það sé ekkert sniðugt að vera með kúrekahattinn og svipuna í rúminu nóttina fyrir orrustu. En jú það er alveg fínt. Ég hef alveg tekið 1-2 vikur þar sem ég hef ekkert spáð í þeim hlutum og reynt að halda í þá orku. Þetta er náttúrulega mikil sprengiorka sem að maður leysir úr læðingi þegar maður er að stunda kynlíf," segir Gunnar sem staðfestir að hann geymi orkuna þegar það eigi við.

Gunnar mætir Jorge Santiago frá Brasilíu í UFC-keppninni á Wembley á laugardaginn. Af því tilefni er Gunnar í skemmtilegu viðtali á vefsíðunni Bardagafregnir.is.

Í viðtalinu er Gunnar beðinn um að svara spurningunni hver hann sé.

„Maður sem vill hafa hlutina tiltölulega einfalda í kringum sig. Kannski útaf því að hann er frekar einfaldur eða flókinn á einhvern hátt, en það eru einfaldir hlutir sem ég þrái og vil. Ég hef áður sagt það við vini mína að ef ég hef mat, húsaskjól, get stundað mína íþrótt, átt kynlíf með kærustinni minni og hitt vini mína og fjölskyldu þá er ég vel settur. Mér finnst það svona eina sem ég þarf, en svo kannski ofan á það þá myndi ég vilja ferðast og upplifa nýja menningarheima og nýja staði," segir Gunnar.

Gunnar segir frá uppáhaldsmat sínum, hvernig hann komst í kynni við bardagaíþróttir og hvers vegna hann hætti í menntaskóla. Þá telur hann persónuleika sinn ekki alltof spennandi með tilliti til þess að í raun sé um söluvöru að ræða fyrir UFC-fyrirtækið.

Viðtalið í heild sinni má sjá á Bardagafregnir.is.

Bardagi Gunnars og Santiago fer fram á laugardagskvöldið og hefst bein útsending á Stöð 2 Sport klukkan 20.