Ryan Gosling farinn af landi brott

Ryan Gosling er farinn frá íslandi en hann hefur verið hér á landi að klippa kvikmynd sína How To Catch A Monster með Valdísi Óskarsdóttur. Kona hans, Eva Mendes, var einnig hér á landi um tíma en fór fyrir skömmu. 

Mikið hefur farið fyrir veru Gosling hér á landi og hafa Íslendingar verið ósparir á að deila upplýsingum um hvað hann hefur haft fyrir stafni. Það sást til hans á Slippbarnum í drykk og einnig fréttist af því að hann væri í einkaþjálfun í Mjölni. Þá birtust fréttir af því að hann hefði lent í aftanákeyrslu á Sæbraut. Þær fréttir reyndust hins vegar ekki á rökum reistar.

Það eru eflaust margir aðdáendur leikarans sem svekkja sig á því að hafa ekki rekist á Gosling meðan hann var hér á landi. Þeir verða líklega að láta sér myndina nægja en búist er við að hún komi í kvikmyndahús næsta sumar.