Menn þurfa að bíða niðurstöðu nefndar áður en spáð er fyrir þenslu

„Í fyrsta lagi er rétt að ef húsnæðisskuldir eru niðurfelldar þá mun það valda mikilli þenslu en við erum að tala um skuldaleiðréttingu, ekki niðurfellingu,“ segir Frosti Sigurjónsson þingmaður Framsóknarflokksins um spá sérfræðinga Seðlabankans að niðurfelling skulda geti leitt til aukinnar verðbólgu. 

„En varðandi skuldaleiðréttingu þá fer algjörlega eftir því hvernig leiðréttingin er framkvæmd hvaða áhrif það hefur á efnahagskerfið. Forsætisráðherra hefur bent á þá leið að hægt væri að breyta eftirstöðvum lána, eftir leiðréttingu, í óverðtryggð lán. Þá lækkar greiðslubyrði einstaklinga ekki eins mikið en það eignast meira í húsnæði sínu og eigið fé skilar sér til fólksins,“ segir Frosti.

Frosti bendir einnig á að niðurstöður nefndarinnar séu væntanlegar og menn verði að bíða rólega og sjá hvað kemur út úr þeirri vinnu áður en spáð er þenslu í kjölfar aðgerðanna.

Í riti Seðlabankans velta sérfræðingar fyrst og fremst fyrir sér hver þróun atvinnuleysis verði á næstu misserum.

Í lokaorðum kemur fram að ef hið opinbera sýnir ekki ráðdeild í opinberum fjármálum, hvort sem litið er til útgjalda eða mögulegra skuldalækkana eða skattabreytinga, eða ef aðilar vinnumarkaðarins semja um hækkun launakostnaðar sem samræmist ekki verðbólgumarkmiðinu við gerð kjarasamninga í haust munu áhrifin verða aukin verðbólga og minni atvinna. Við því yrði peningastefna Seðlabankans að bregðast, sem vegna heldni í atvinnuleysi getur haft í för með sér að atvinnuleysi verður meira og þrálátara en ella.