Karlmenn kaupa barnaföt í Mjölni

„Viðskiptahugmyndin fæddist í rauninni í Mjölni, en bróðir minn, Bjarni Baldursson, er einn af þeim sem stofnuðu Mjölni fyrir tæplega tíu árum síðan. Þar kynntist hann konunni sinni og þau áttu von á barni þegar ég fór að leita að gjöf og datt í hug að gefa þeim lítinn bardagagalla. Svo fór ég að leita úti um allt á netinu og fann ekkert,“ segir Berglind Baldursdóttir, eigandi vörumerkisins Baby Grappling. 

Berglind Baldursdóttir hannar og selur bardagagalla fyrir ungbörn en segist sjálf ekkert hafa verið í bardagalistum.

Hún hafi einfaldlega verið að leita að gjöf sem leiddi hana út í frekari barnafataframleiðslu á fyrirburafötum og bardagagöllum úti í heimi.

Helstu viðskiptavinir hennar eru Bandaríkjamenn sem kaupa fötin aðallega í gegnum Amazon á netinu.

„Ég saumaði sjálf fyrstu prótótýpuna og var svo heppin að á þessum tíma vann ég sem deildarstjóri í samþykktardeildinni hjá Latabæ þar sem maður lærir á nánast allar vörur og vöruflokka sem tengjast börnum. Meirihlutinn af þeirri vinnu sneri að barnafataframleiðslu þannig að ég var með rosalega góðan bakgrunn,“ segir Berglind. 

Baby Gi-gallarnir fást í netversluninni babygi.com og í Óðinsbúðinni í Mjölni en þeir eru í hvítum, bláum og rauðum litum og eru einnig væntanlegir í bleiku í netverslunina.