Sögulegur sigur hjá Þórey, Rut og félögum

Team Tvis Holstbro vann sögulegan sigur á Viborg HK í slag Íslendingaliða í dönsku kvennadeildinni í handbolta í dag en þetta var fyrsti sigur Tvis-liðsins á Viborg frá upphafi. Team Tvis Holstbro vann leikinn 32-29 en þetta var fimmti deildarsigur liðsins í röð.

Óskar Bjarni Óskarsson þjálfar lið Viborg HK en með Team Tvis Holstbro spila íslensku landsliðskonurnar Þórey Rósa Stefánsdóttir og Rut Jónsdóttir. Þetta var annar tapleikur Viborg í röð og sá þriðji í síðustu fjórum leikjum.

Þórey Rósa skoraði tvö mörk í leiknum og Rut skoraði eitt mark. Viborg HK var einu marki yfir í hálfleik, 16-15, en 2837 manns sáu þennan spenanndi og skemmtilega leik.

Team Tvis Holstbro er nú í 3.sætinu aðeins einu stigi á eftir Viborg HK sem er að sama skapi að missa frá sér deildarmeistaratitilinn til FC Midtjylland. FC Midtjylland er nú með fjögurra stiga forystu og á auk þess leik inni.