Steranotkun í undirheimum hefur áhrif á störf lögreglu

Steinar Adolfsson, framkvæmdastjóri Landssambands lögreglumanna segir ljóst að steranotkun hafi breytt framferði manna í undirheimum. Nú síðast í dag var mikið magn stera handlagt af Tollgæslunni. Þar reyndi maður tæplega sjötugur karlmaður að koma hátt í 70 þúsund skömmtum af sterum inn í landið.

Steinar, sem var gestur í útvarpsþættinum Reykjavík síðdegis á Bylgjunni í dag, er sannfærður um að notkun stera hafi haft áhrif á undirheima.

„Þessi efni eru auðvitað ætluð til dreifingar og það er ljóst að þessi efni hafa áhrif á fólk," segir Steinar. „Fólk verður óútreiknanlegt. Og þegar lögreglumenn fást við fólk í slíku ástandi getur ýmislegt gerst."

„Þetta leiðir hugann að mikilvægi þess að lögreglan sé vel búin tækjum og tólum, og sem best mönnuð."

Steinar segir að lögreglumenn þurfi oft á tíðum að takast á við menn sem séu ærðir af notkun stera. Hann segir lögregluna hafa fylgst náið með þessari þróun mála síðastliðin ár.

„Það hafa komið upp mjög alvarleg atvik þar sem háttsemi manna hefur skapað mikla hættu," segir Steinar. „En lögreglan er meðvituð um þetta. Því er afar jákvætt að þetta mál í dag séu upplýst á þessu stigi."