Kára-lausir Wetzlar-menn töpuðu

Wetzlar tapaði með þriggja marka mun á útivelli á móti sjóðheitu liði Lemgo, 27-30, í úrvalsdeildinni í handbolta í kvöld. Lemgo hefur unnið alla leiki sína síðan um miðjan desembermánuð.

Wetzlar lék í kvöld án íslenska landsliðslínumannsins Kára Kristjánssonar sem verður frá næstu mánuðina vegna meiðsla. Fannar Þór Friðgeirsson spilaði með Wetzlar en komst ekki á blað í kvöld. Bæði skot hans voru varin.

Wetzlar var einu marki yfir í hálfleik, 16-15, en Lemgo var sterkara eftir hlé og landaði sínum sjötta deildarsigri í röð.

Wetzlar hefur aðeins unnið einn af síðustu sjö leikjum sínum og Lemgo náði liðinu að stigum með þessum sigri í kvöld.

Lemgo-liðið er nú með lengstu sigurgönguna í deildinni í gangi en liðið tapaði síðast 16. desember.