Gæti opnað margar dyr fyrir mig

Kristinn Pálsson, 16 ára leikmaður Njarðvíkur, mun leika með ítalska unglingaliðinu Stella Azzurra Rome næsta vetur. Kristinn er gríðarlega efnilegur og leikið marga leiki fyrir yngri landslið Íslands. Þetta mun vera gott tækifæri fyrir leikmanninn og gæti opnað margar dyr fyrir hann í framtíðinni. Allt byrjaði þetta í fyrrasumar er Kristinn lék með unglindalandsliði Íslands. Þar fylgdist ítalskur þjálfari með leikmanninum og í framhaldinu af því var Kristni boðið að taka þátt á móti í Barcelona með liðinu. Þar stóð drengurinn sig með stakri prýði og var meðal annars valinn besti ungi leikmaður mótsins.

„Ég var að spila við stráka sem voru þremur árum eldri en ég á þessu móti og stóð mig mjög vel,“ segir Kristinn Pálsson í samtali við Fréttablaðið í gær.

„Þetta var aljóðlegt mót sem ég tók þátt í og margir virkilega góðir leikmenn sem ég var að kljást við. Það gekk allt saman rosalega vel og ég var kjörinn besti ungi leikmaður mótsins.“

Núna hefur Stella Azzurra Rome boðið leikmanninum að vera hjá liðinu næsta árið en hann flytur endanlega til Ítalíu í haust.

„Strax eftir mótið var mér boðið að koma til liðsins og vera þar allt næsta tímabil. Þetta er í raun einskonar körfuboltaakademía þarna á Ítalíu og allar aðstæður til fyrirmyndar. Það leika því bara ungir strákar með meistaraflokksliði Stella Azzurra Rome sem er í þriðju efstu deild Ítalíu.“

Dvölin á Ítalíu getur opnað margar dyr fyrir Kristinn.

„Ég mun fara í Marymount-skólann í Róm en hann er bandarískur og öll kennsla fer fram á ensku. Þegar ég hef lokið við þann skóla hef ég tækifæri til að fara í Háskóla í Bandaríkjunum og því er þetta frábært tækifæri fyrir mig.“

„Ég er mjög spenntur fyrir þessu og er tilbúinn að takast á við nýjar áskoranir.“ Kristinn Pálsson var við útskrift sína í gær þegar Fréttablaðið náði tali af honum.

„Ég var að útskrifast úr 10. bekk áðan svo það er margt að gerast hjá mér þessa daganna.“