Sjóðheit varalitatíska

„Mér finnst mattar varir málið í sumar því það er mjög flott andstæða við ljómann í húðinni. Mattar varir voru einnig mjög áberandi á tískupöllunum fyrir sumarið í þessum dökkbleiku og órans-tónum,“ segir Kristín Edda Óskarsdóttir förðunarfræðingur og bætir við að sterkir litir verði áfram vinsælir í varalitatískunni í sumar.

Kristín Edda sýndi Lífinu hvernig lostafullar varir eiga að líta út í sumar og notaði varaliti frá Chanel, Edition, Mac og Bobby Brown.

Kristín Edda segir íslenskar konur vera ófeimnar við að nota liti enda séu þær mjög meðvitaður um hvað sé í gangi hverju sinni.

Dökkbleikir, appelsínugulir og kóral-litir verða sérstaklega vinsælir og varalitablýanturinn er nauðsynlegur með og þá einna helst með dökkum varalitum eins og hafa verið vinsælir upp á síðkastið. Hins vegar sé öðruvísi stemning í gangi núna þar sem línurnar eru mikið mýkri en áður. 

Kristín Edda mælir einnig með því að undirbúa varirnar með vara-primer og hvíla aðeins blýantinn.

„Ég er akkúrat núna mjög hrifin af dökkbleikum litum og pastel-fjólubláum tónum. Uppáhaldsmerkið mitt er Mac. Ég hef elskað það frá því að ég gekk inn í búðina í fyrsta skipti. Ef ég þarf að nefna einn lit þá fékk ég mér Girl About Town-varalitinn frá MAC. Ég gæti ekki verið ánægðari með hann.“