Bríó bjórinn í útrás til Kanada

„Við erum himinlifandi með þetta. Okkar forfeður verða líka að fá að smakka bjórinn þó þeir hafi flúið land,“ segir Kormákur Geirharðsson. Borg Brugghús gekk nýverið frá samningum um útflutning á verðlaunabjórnum Bríó til Kanada og verður hann til sölu í matvöruverslunum.

„Margir hafa sýnt bjórnum áhuga, meðal annars hafa menn á Spáni og í Svíþjóð komið að máli við okkur. Samningurinn í Kanada er aftur á móti kominn til í gegnum eldri samning við Ölgerðina, en eftir að þeir smökkuðu Bríó vildu þeir endilega taka hann inn.“

Bjórtegundin kom í sölu hér á landi fyrir rúmum þremur árum og var búin sérstaklega til fyrir Ölstofuna, sem rekin er af Kormáki og Skildi Sigurjónssyni. „Við vorum fengnir til að aðstoða við að búa bjórinn til. Við smökkuðum nokkrar tegundir, völdum eina og vorum svo í níu mánuði að smakka hann til,“ útskýrir Kormákur og kveðst hæstánægður með útkomuna. „Menn sem byrja og finna bragðið, geta ekki drukkið annað eftir það.“