Garðabær útnefnt Draumasveitarfélagið

Garðabær hefur verið útnefnt Draumasveitarfélagið fjórða árið í röð af vikuritinu Vísbendingu, þar sem farið var yfir fjárhag 36 stærstu sveitarfélaganna. Garðabær mun þá vera best stadda sveitarfélagið fjárhagslega séð og gefur Vísbending því 8,8 í einkunn. Það er eina sveitarfélagið sem er með yfir 8,0 í einkunn.

Það sem gerir Garðabæ að draumasveitarfélaginu er meðal annars að útsvarsprósentan þar er lægri en annars staðar, skuldir sem hlutfall af tekjum eru 72% og veltufjárhlutfall er 82%.

Í öðru sæti er Seltjarnarnes með 7,2 en það var í níunda sæti á síðasta ári. Snæfellsbær og Hornafjörður eru bæði með 7 í einkunn og sitja í þriðja sæti listans. Á botni listans sitja Kópavogur með 2,8, Fljótsdalshérað með 2,6 og Álftanes með 0,9. Meðaltal sveitarfélaganna er 4,8.

Notaðar eru rekstrartölur úr ársreikningum sveitarfélaga árið 2012 og nýjustu tölur sem liggja fyrir. Reykjavík situr í 31. sæti og hefur fallið niður um fjórtán sæti á milli ára og Grindavíkurbær stekkur upp um tuttugu sæti og er nú í því tíunda.

Samkvæmt umfjölluninni fer fjárhagur sveitarfélaga hægt batnandi og skuldir fara lækkandi að raunvirði.