Ekki ólympíuandinn að selja silfurverðlaunin

„Þetta er klárlega ekki ólympíuandinn“, segir Lárus Blöndal, forseti ÍSÍ, um fréttir af því að íslensk ólympíusilfurmedalía sé til sölu.

Vísir sagði frá því í gær að Safnaramiðstöðin hefði slíkan grip til sölu og virðist því sem einhver liðsmaður íslenska handboltalandsliðsins sem vann til silfurverðlauna á Ólympíuleikunum í Peking árið 2008 vilji koma þeim í verð.

Lárus segir sambandið hafa fengið fregnir af sölunni í gærkvöld og muni skoða málið í dag en gerir þó ráð fyrir að þetta sé ekki óheimilt.

„Þetta er ekki óþekkt út í hinum stóra heimi en það er þá oft í þágu góðs málefnis. Mér finnst þetta sorglegt segir Lárus.“