Geir og Erlingur stýrðu báðir sínum liðum til sigurs

Geir Sveinsson, þjálfari HC Bregenz, og Erlingur Birgir Richardsson, þjálfari SG Westwien, stýrðu báðir sínum liðum til sigurs á útivelli í kvöld í austurrísku úrvalsdeildinni í handbolta.

Liðin eru með jafnmörg stig í 3. og 4. sæti deildarinnar fjórum stigum á eftir toppliði HC Hard. Sigrarnir í kvöld komu á móti liðum sem voru neðar í töflunni.

Geir Sveinsson sá sína stráka vinna þriðja deildarleikinn í röð þegar liðið vann 30-27 útisigur á  ULZ Schwaz en Bregenz-liðið hefndi um leið fyrir tap í bikarleik liðanna fyrir aðeins þremur dögum.

Það stefndi reyndar í annan sigur Schwaz sem var 19-17 yfir þegar 20 mínútur voru eftir. Geir tók þá leikhlé og kveikti i Bregenz-liðinu sem vann lokakafla leiksins 13-8.

Erlingur Birgir Richardsson stýrði SG Westwien til 38-36 sigurs á Union Leoben á útivelli en staðan í hálfleik var 23-19 fyrir Westwien.  Westwien er búið að vinna sex af síðustu átta deildarleikjum sínum.

Staðan var 36-36 þegar þrjár mínútur voru eftir en austurríski landsliðsmaðurinn Konrad Wilczynski skoraði tvö síðustu mörk leiksins og tryggði sínum mönnum sigurinn.