Vilhjálmur gefur lítið fyrir ummæli forseta ASÍ

Forseti ASÍ segir að sú leið sem að þau stéttafélög, sem höfnuðu nýgerðum kjarasamningum, vildu fara hefði valdið 14% verðbólgu. Ekki boðlegur málflutningur segir formaður Verkalýðsfélags Akraness.

Gylfi Arnbjörnsson, forseti Alþýðusambands Íslands, skrifaði grein á vefsíðu Pressunar í gær þar sem hann fer yfir þann ágreining sem er innan ASÍ með nýgerðan kjarasamning. Fimm stéttafélög höfnuðu samningum á þeim grundvelli að launahækkanir til þeirra lægst launuðu væru of rýrar.  

Gylfi segir að gengi íslensku krónunnar myndi ekki standa af sér 13-15% launahækkun. Þá hefði farið í gang hefðbundin víxlverkun gengis, launa og verðlags með þeim afleiðingum að verðbólgan gæti farið í allt að 14%.

Vilhjálmur Birgisson, formaður Verkalýðsfélags Akraness, segist ekki vita á hvaða vegferð forysta Alþýðusambandins sé á.

„Það sem að kröfugerð Starfsgreinasambands Íslands byggðist á var 20 þúsund króna hækkun lægstu launa. Að lægsti taxti færi úr rétt rúmum 191 þúsund krónum og upp í 211 þúsund,“ segir Vilhjálmur. „Menn verða að fyrirgefa mér það að ef forseti Alþýðusambands Íslands vill meina það að það verði nánast jafnmikið hrun hér og þegar bankahrunið mikla varð hér árið 2008 við það eitt að verkafólk fá hækkun á sínum launum þá veit ég bara ekki á hvaða vegferð forysta Alþýðusambands Íslands er á.“

 

Ekkert sagt þegar laun stjórnenda hækka

Vilhjálmur undrast málfutning forseta ASÍ og segir að lítið hafi heyrst í forystu ASÍ þegar laun ríkissforstjóra voru hækkuð um 20%.

„Það voru ekki 20 þúsund krónur sem þeir hækkuðu um á mánuði - nei þeir voru að hækka um allt að 280 þúsund. Núna fyrir örfáum dögum síðan þá hækkaði forstjóri Íbúðalánasjóðs um tæp 80 þúsund til viðbótar þeim 110 þúsundum sem hann fékk í júlí eins og aðrir sem heyra undir kjararáð. Svo eru lykilstjórnendur fyrirtækja líkt og Arion banka, Íslandsbanka og ég tala nú ekki um olíufélagið N1 að taka upp kaupaukakerfi sem getur skilað eins og hjá N1 allt að 19 milljónum meðfram þeim launum sem lykilstjórnendur hafa. Svo þegar það á að láta verkafólk hafa 20 þúsund krónur hækkun á sínum mánaðarlaunum, nei heyrðu þá á að verða hér annað efnahagshrun,“ segir Vilhjálmur.